Ngā hua o te Hangarau Matihiko: Lucia Ehu Hamilton

I tīmata noa a Whaea Lucia hei tautoko i āna ākonga ki te whakatinana i ō rātou wawata mō te Hangarau Matihiko. I te taha o āna ākonga, ko tōna huarahi mō te wetemaukati i ngā pitomata o te Hangarau Matihiko me te ako tahi hoki. Mā te toro ki ngā rauemi mā Kia Takatū ā-Matihiko me ngā mātanga paetata, e whakapakari ana ia i tōna māiatanga i te Hangarau Matihiko ia rā, ia rā.

Tirohia te kōrero mō Whaea Lucia ki raro nei.

Ko Lucia Ehu Hamilton ahau. Nō Te Māhia. 

Kei roto au i Te Wairoa nei e noho ana. Tokotoru o āku tama. Tokorua kei Ahitereiria e mahi ana.  Tokotahi kei Taupō e mahi ana. 

I tīmata noa iho mātou, i ruku ki roto nā te mea, kei konei a Greg Ford me Wī McNabb he tino mātanga rāua ki tēnei momo mahi, a..nā te kōrero tahi, te mahi tahi, i whakaaro, me mahi, me mahi te mahi. Ahakoa kāore anō kia tino titiro hōhonu ki te marau, a.. kei te mahi i te mahi kia tūwhera ki ngā tamariki. Mā rātou hoki e whakaako mai… i a mātou ngā pouako. Nā te mea, kei te tūwhera rātou, kei te hiahia rātou ki tēnei momo mahi.

Nā reira, i whakaaro me ngana ahau ki te whakarewa ake i tēnei kaupapa, te mahi matihiko, nā te hui ki Pūtahi, i whakaaro, he rawe, he rawe te kaupapa nei.

Ka haere au ki ngā whakangungu a..i...ka whakatū a Greg. He whakangungu ki te tāone, kia tūwhera te marau ki a mātou, ia Rāapa, haurua i te 4 ki te haurua i te 5, ka haere ki tana taha, kei roto i te reo ngā mea katoa, Ka ako mātou. Ka akiaki i aku hoa ki te haere, ki te kore ka hoki mai ahau me ngā, me te whakamārama atu. Hei awhi i ngā kaiāwhina, nā te mea, he maha ngā kaiāwhina kei konei, i te taha o ētahi tamariki, ngā ira o tua, nā reira, i whakarite he, he akorango mō ngā Bee-Bots mā rātou, he..ko te wā o te Aranga, i whakarite i ētahi hēki ki runga, ā, mā rātou e ārahi te karetao kia tae atu, kia tae atu ki ērā hēki. Ā, i mīharo rātou ki tērā, i kite rātou te painga. Nā reira, i tīmata hoki ngā pouako ki te āta titiro me te whakaaro me pēhea rātou e whakamahi. Nō reira, ko te pouako Tau 7-8 kei te kaha ia ki te...kua ne..āhua pakeke ana tamariki, nā reira, kei te whai rātou i te hanga, te hanga rātou i ngā karetao, me te whakahaere karetao.  

[tamariki playing]

I te tīmatanga o te tau, i uiui mātou i te akomanga, ‘He aha ngā whāinga e pīrangi ana koe mō tēnei tau?’ Ko te nuinga, ko te matihiko.  Ko te mahi i te rapirapi. Nā reira i whakaaro, me ngana ki te whakatutuki i ō rātou wawata.

Kāore au i te paku mōhio i te aha au, engari i tīmata, i whakaaro, tērā pea me pēnei, me pēnā, kātahi ka...mā te hapa ka ako nē? He iro me kī. Ka puta mai he iro, anā, whakatika, haere tonu. Āe, ki a au nei, nā te mea, kua reri ngā tamariki. Kua rite. Me rite hoki mātou ngā pouako, me rite.  Me tūwhera ngā...ngā..ngā ao katoa ki te tamaiti. Nā te mea, ka...ka uru ki te roro, he..he.. whāwhā, he hangahanga nē? He..ka tere ako te tamaiti mā te mahi ka ako, mā te hapa ka ako, nā reira, he pai, he pai te hapa.  Ehara i te mea me tika ngā mahi a te pouako i ngā wā katoa.  

Kia kaha ki te haere ki ngā whakangungu ki te titiro ki te ipurangi, te whārangi, Kia Takatū ā-Matihiko nā te mea, kei reira ngā Pīkau hei awhi i a koe. A..whakapono ki a koe anō, ka taea e koe. Kei roto i tērā whārangi he nui ngā awhi.  Āe, he mīharo, me mahi te mahi.

Ka mihi ki a Kia Takatū ā-Matihiko. Āe, he..mei kore ake rātou kei raro au e putu ana me tēnei kaupapa. Āe, tino..tino mīharo. He rawe ngā awhi, ngā tautoko...a...he whārangi e āhei ana te tuku pātai, ērā momo āhuatanga āe, āe, ka mihi.

He aha ngā ara Hangarau Matihiko e kite ana koe mā ō ākonga? Tūhuratia ō whakaaro ki te taha o ētahi atu kaiako ki Ngā Kiriahi / Community of Practice i konei hono.