Ngā Waehanga o te Hōtaka

Kua whakaritea ngā āhuatanga huhua o Kia Takatū ā-Matihiko, Te Hōtaka Takatū ā-Matihiko ā-Motu, hei āwhina i a koe ki te tūhura kia māia ai koe i tō whakaako i ngā wāhanga hangarau e rua i roto i te marautanga; Te Whakaaro ā-Rorohiko me Te Tangata me te Rorohiko.

Te Tokorima-a-Mahuika / Self Review Tool

Te Tokorima-a-Mahuika

Mā Te Tokorima-a-Mahuika / Te Utauta Tātari Whaiaro e kite ai koe i tō takatū ki te whakamahi hangarau matihiko, ā, ka tohu hoki ki a koe ko tēhea te pīkau pai (akoranga ā-tuihono poto) hei āwhina i tō takahi i tēnei huarahi ako.

He wāhanga matua Te Tokorima-a-Mahuika / Te Utauta Tātari Whaiaro o te Hōtaka Takatū. Tekau mā rima ngā pātai, ā, kua whakaritea kia tukuna te urupare ki a koe mō tō 'takatū' ki te whakamahi i ngā ihirangi hou o te Hangarau Matihiko, ā, kia tautohua hoki ngā rauemi hei āwhina i a koe i tō huarahi ako, ahakoa kei hea koe i taua huarahi.

Kia auau te whakamahinga o te utauta i tō huarahi i te hōtaka Kia Takatū ā-Matihiko kia kite ai koe i tō tipuranga, kia whiwhi hoki koe ki ētahi tautohunga rauemi anō hei taunaki i a koe.

Te arotake ā-rōpū

E whakamātauhia ana te takatū o tō kura, o tō rōpu rānei ki te whakatinana i ngā ihirangi o te Hangarau Matihiko? He āheinga tō Te Tokorima-a-Mahuika hei arotake i ngā rōpū, e whakakotahi ana i ngā hua muna o ngā tātaritanga whaiaro takitahi ki te pūrongo kotahi kia kitea ai te whānuitanga o ngā kōrero mō te takatū o tētahi rōpū.

Ko tā te pūrongo he āwhina i a koe ki te tautuhi i ngā āhuatanga e kaha ana me ngā whai wāhitanga mō te rōpū kia pai ai te whakatau ko hea ngā akoranga me ngā taunakitanga ngaio ka pīrangitia ā tōna wā.

Pīkau

He kohinga akoranga tuihono poto ngā Pīkau e pakari ai te māramatanga me te māia o te kaiako ki te whakamahi i ngā hangarau matihiko.

Ko te tikanga o te pīkau, he pēke tuarā, he keteparaha rānei. He akoranga tuihono poto ia pīkau e tuari ana i ngā pārongo whai hua, ngā pārongo hāngai me ngā rauemi kia pakari ai tō māiatanga ki te whakauru ki ngā hangarau matihiko. Tae rawa atu ki te mutunga o tēnei hōtaka takatū (Kia Takatū ā-Matihiko) ka whai pīkau koe o ngā rauemi hei whakamahi ki te whakaako me te ako i ngā ihirangi hou o te Hangarau Matihiko.

Te whiriwhiri pīkau

Hei te tīmatanga o ia pīkau, he kupu whakataki. He ataata e whakamārama ana i ngā pārongo mō ngā ihirangi o te pīkau kia pai ai tō whakatau mēnā rānei koinā te mea tika hei whai māu. Ahakoa e whakaoti ana koe i tētahi pīkau ki te taumata Hika, ki te Whitawhita rānei i tō takatūtanga ā-matihiko (whakamahia Te Tokorima-a-Mahuika kia kite ai koe kei hea koe), he mahi rāwekeweke ka taea e koe te whakamahi i tō wāhi ako. Ka mōhio hoki koe kia hia te roa hei whakaoti i te pīkau. Mō te nuinga, ko tōna 45 miniti te roa ki te whakaoti i tētahi pīkau. Ehara i te mea me whakaoti koe i te pīkau kotahi i te wā kotahi. E pai ana kia rite tonu tō hoki atu me te whakaoti i a koe ka rite.

Ngā Kiriahi / Te Hapori Tuihono

Ko Ngā Kiriahi tō mātou wāhi motuhake mā te hapori tuihono o Kia Takatū ā-Matihiko. Ka whai wāhi koe ki te tūhono ki ngā kaiako puta noa i te motu ki te kōrero mō ngā Hangarau Matihiko.

Ka pōwhiri mātou i a koe ki te hono ki te takimano kaiako e whakamahi kē ana i Ngā Kiriahi ki te aro ki ngā ihirangi, ngā rauemi me ngā kōrero e pā ana ki tēnei hōtaka (tae atu hoki ki ngā Pīkau, Ki te Ahikāroa, Ngā Rauemi Pīkau me te maha atu anō) me ngā ihirangi marautanga hou o te Hangarau Matihiko.

Ka kitea i konei Ngā Rōpū (groups) me Ngā Matapakinga e whai ana i ngā ihirangi me ngā kōrero e taunaki ai i ngā hononga hapori mō ngā kaiako arareo Māori me ngā kaiako arareo Pākehā hoki. Hāunga atu te tuku kōrero ki ngā matapakinga e rere ana, ka taea hoki e koe tētahi miro matapakinga te tīmata, ō ake rōpū rānei te waihanga.

Kauhaurangi Tuihono

Kua hoahoaina tā mātou hōtaka Kauhaurangi Tuihono hei tautoko i a koe ki te whakauru i ngā whakahoutanga o ngā ihirangi marautanga o te Hangarau Matihiko i roto i tētahi akomanga mariko.

Ka 30 miniti te roa o ngā Kauhaurangi, ā, ka tokoiti hoki ngā tāngata kia whai hua ai te akoranga. Ka whakakapi ngā rauemi i te whakaako hangarau matihiko mā te reo matatini, te puoro, te kōrero pūrākau, me te maha atu anō. Hei te mutunga o tētahi hui, ka taea e koe ō ake akoranga te panoni hei mahere ako māu i taua wā tonu.

Ki te Ahikāroa / Ngā Hui ā-kaupapa

He pahekotanga ngā hui Ki te Ahikāroa, ko ngā hui ā-kaupapa rānei o ngā mahi rāwekeweke, ngā awheawhe kanohi ki te kanohi i tō rohe, tae atu hoki ki ngā hui ā-tuihono (ngā kauhaurangi pāhekoheko) hei whakaurutanga mā te katoa.

He kore utu ngā Hui ā-kaupapa, ā, ka whai wāhi ngā kiritaki ki te whakauru ki ngā akoranga hou, me te whakapuaki i ngā taumahi me ngā whakaaro mō te whakaurunga o te Hangarau Matihiko ki ngā hōtaka akomanga. Mā te hui ā-kaupapa e whai wāhi ai koe ki te tūhono, ki te tipu, ki te ako hoki tētahi i tētahi, e tautoko ana i a koe kia māia, kia takatū hoki ki te whakatinana i te Hangarau Matihiko.

Kua whakatārewahia tā mātou hōtaka kanohi ki te kanohi i tēnei wā. Tirohia tā mātou hōtaka Kauhaurangi Tuihono e rere ana tae atu ki te mutunga o te Wāhanga 3.

Rauemi Pīkau

Ko ngā rauemi pīkau, he tauira e whakaatuhia ana me pēhea te whakauru i te Hangarau Matihiko ki roto i tō marautanga.

E wātea ana ngā rauemi pīkau hei whakamahi māu, ā, ko tōna whāinga, ko te noho hei tino tauira whānui e whakaatuhia ana me pēhea tō whakauru i te Hangarau Matihiko ki te marau ā-kura mā ngā horopaki hāngai me ngā horopaki tūturu hoki.

Kua hoahoaina ia rauemi pīkau me te whai whakaaro ki te āhuatanga urutaunga, e pai ai tō āheitanga ki te whakahāngai i te akoranga ki tō horopaki. He tauira wātea e taea ana te tikiake hei āwhina i a koe i tō mahi tahi ki ō hoa ki te tūhura i ētahi huarahi e whakaako ai koe i te Hangarau Matihiko.