Kia ngiha

te Pito Mata

Ki konei ako ai e pā ana ki te Hangarau Matihiko hei tautoko i ō ākonga.

Nau mai rā

E tautoko tahi ana te Tāhuhu o te Mātauranga rātou ko CORE Education me ngā umanga āpiti i te whakatakinga o te ihirangi marautanga hou o te Hangarau Matihiko ki ngā kura mā roto mai i te hōtaka Kia Takatū ā-Matihiko. Ko te hōtaka o Kia Takatū ā-Matihiko tētahi o ngā kaupapa ngaio e toru nā Te Tāhuhu o te Mātauranga e whakataki ana i te ihirangi marautanga hou o te Hangarau Matihiko.

He aha a Kia Takatū ā-Matihiko?

Kua whakawhanakehia a Kia Takatū ā-Matihiko, te Hōtaka ā-Motu Takatū ā-Matihiko, kia pai ai te whakamana i ngā kaiako ki te whakamahi i ngā ihirangi hou o te marautanga Hangarau Matihiko i te Wāhanga Ako Hangarau.

I takea mai te hōtaka i te pūrākau o Māui, tōna kuia Mahuika, arā ia te pūrākau mō te tūhuratanga o te pūtake o te ahi. He pākiki, he toa, he pūkeke a Māui, ā, he nui tōna hiahia kia pai ake ai ngā mea katoa. He whaiwhakaaro, he manawanui, he kakama a Mahuika. He āhuatanga ēnei hei whakamahi mā ngā kaiako puta noa i Aotearoa hei tautoko i ā tātou tamariki katoa kia tū rātou hei kaihanga, hei kaiauaha hoki o te hangarau matihiko.

Ka pēhea tēnei hōtaka e tautoko i ahau?

Ka tautoko tēnei hōtaka i a koe ki te tūhura i ngā wāhanga e rua o te wāhanga ako hangarau o te marau, arā te Whakaaro Rorohiko me te Tangata me te Rorohiko, mā roto tonu i ētahi tautoko whānui:

Ka whakamahi ai koe i te Utauta Tātari Whaiaro/ Te Tokorima-a-Mahuika kia kite i tō whanaketanga i te hangarau matihiko. Ka tūtohu te utauta i te Pīkau e hāngai ana. He akoranga tuihono poto ia pīkau e tuari ana i te mōhiohio whaihua e hāngai ana me ngā rauemi hei āwhina i a koe kia whai māramatanga, kia whakaako pai hoki i te hangarau matihiko hei marau.

E hia manomano kaiako i tō mātou hapori ā-tuihono Ngā Kiriahi. Ka whakahau mātou kia takiuru koe me te toro ki ngā ihirangi, ngā rauemi me ngā matapaki e pā ana ki te hōtaka takatū.

Rēhitatia kia hono ki tētahi hui ā-kaupapa/ Ki te Ahikāroa i tō rohe, ki tētahi hui ā-tuihono rānei. Mā konei ka pai tō toro ki ngā akoranga hou me te whakapuaki i ngā mahi me ngā whakaaro mō te whakauru i te Hangarau Matihiko ki roto i ngā hōtaka akomanga.

He tino pai ngā Rauemi Pīkau ki te ruku hōhonu kia kite ai ka pēhea tō whakauru i te Hangarau Matihiko ki roto i te marau ā-kura mā ngā āhuatanga me ngā horopaki tūturu. He rauemi marautanga kore utu ēnei e wātea ana ā-tuihono, mā te tikiake rānei.

I roto i ngā āhuatanga motuhake o te wā, e mōhio ana mātou ki te hiranga nui o te whai tautoko, utiuti kore noa iho nei

Kua waihangatia tētahi whārangi rauemi hou hei āwhina kia māmā ake ai te mahi. Ka kitea i taua whārangi rā ngā pānui whakaahua, ngā mātārere, ngā ngohe whakaako, ngā Rauemi Pīkau me ngā hononga ki ētahi rauemi whai hua anō - katoa, katoa kua hoahoaina hei āwhina i a koe, tō mārama me tō whakaako i te Hangarau Matihiko kanohi ki te kanohi, ā-tuihono hoki.

Kei te whakamahi koe i ngā tautoko o runga ake nei me te kimi i tō huarahi ki te marautanga hou o te Hangarau Matihiko? Tino pai! Whakamahia anō te Utauta Tātari Whaiaro/ Te Tokorima a Mahuika kia tirohia tō whanaketanga me te whai taunakitanga anō ki te tautoko i a koe i tō huarahi ako.

E hiahia tonu ana ki ētahi pārongo anō e pā ana ki tā Kia Takatū ā-Matihiko e tautoko i a koe i tō huarahi ki ngā hangarau matihiko? Tēnā pāwhiria te hononga nei mō te whakarāpopotonga taipitopito o ia wāhanga o te hōtaka.